a cura del Prof. Franco Delfino Cosimo

U suannu i nu povariaddru 

Mi sunnavu ca mancava ru pani
a povera mamma era affriggiuta
eranu misi ca viviamu cumi cani
nuddra fatiga ancura m'era vinuta  

U papà era malatu povariaddru
avia na malatia troppu brutta
assumijava a nu muscariaddru
e ra pirzuna sua era tutta rutta 

Pirciò cu na valigia cunsumata
cu ru cori jhinu i tanti dispiaciri
e ra faccia  tantu ammusciata
scunzulatu avia dicisu i partiri

Quannu i da partenza vena l'ura
u c'è nuddru ca ti pò mai firmari
puru ca vita  ti para tutta  scura
ppi natra distinazioni t'ai ricari 

cumi n'aciaddru ca pijja ru vulu
e cerca nu postu duvi si firmari
u l'importa si si senta tuttu sulu
na nova vita spera i cuminciari 

U stomacu  rujjava ogni minutu
poca robba mi putia manciari
u cialu s'era fattu cchiù scurutu
u suannu cuminciava a navicari 

Cussì è durmutu sutta nu purtali
nuddru avia n' anticchia i pietà 
pinsava dumani me mintiri l'ali
ppi circari na fatiga i cà e di drà 

A matina a valigia era sparita
l'avianu arrubbata 'ntra nuttata
quannu na figura cumi na zzita
era vicinu a mia tutta cunzata

mi stinnia ri mani profumati
mi dicia azati e vena ccu mia
duvi c'è musica e belli jurnati
lassa su munnu i schifenziria 

Iu mi vuatu cu nu bonu parrari
dicu u papà è statu fatigaturu
u minni puazzu mai scurdari
sulu iju li puazzu dari ristuaru 

Sintiennu si paroli tantu accurati
chira immagini beddra luminusa
m'ha mustratu u papà cu ri biati
duvi ogni santa jurnata è giujusa 

Allura aju capitu cu simu nenti
'ntru munnu ci su tanti incanti
u suli u nescia sulu pi ri potenti
tutti amu viviri senza turmianti 

Chiri duluri ca portava 'ntru cori
eranu cumi tanti luci i di stiddri
scinnivanu  du  cialu cumi tisori
a  sarvari a vita i di povariaddri