a cura del Prof. Franco Delfino Cosimo

  U   quattru i novembri
Chiri muarti ca su scritti subba i marmi
all'incantu i vidimu cu ra divisa e l'armi 

Giuvini giuvini su partuti ppi ra guerra
spiravanu i turnari sarvi a nostra terra 

Anu lassatu mammi fijhi e  mujhera
u cori jhinu i tanta affrittanza vera 

Su partuti cu lacrimi e cu muschiattu
cu tanti pinziari forti intru u piattu 

A ru fronti anu avutu tantu curaggiu
ed anu offertu a vita cumi omaggiu 

Nui ud'amu vistu chiri juarni i furnaci
stintamu a capiri u significatu da paci 

Si ni firmamu avanti  a ru monumentu 
i nomi ni paranu stiddri du firmamentu 

U su cchiù muarti senza paroli ppi ci ristari
ma si su 'mbivisciuti tutti ppi n 'illuminari 

Su ancora  vivi cumi prima si vulimu capiri
camu luttari sempri ppi ra paci i  l'avviniri 

Parranu a tutti ma a ri giuvini cchiù assai
chiru sangu spannutu u si po scurdari mai

Ci su troppi guerri su munnu munnu
e puru tanti mammi vanu erramiannu 

Pirciò un ni dulimu ppi chiru  chi patimu
ringraziamu ancora u Signuri cumi simu