a cura del Prof. Franco Delfino Cosimo

U cignu a Leda l'aquila a Giovi
a Veneri a palumma c' aleggia
a Minerva chira civetta saggia
e a gaddrina a Vesta ppi ri covi

A Esculapiu u gaddru ca canta
chi guarda u cialu quannu jova
scota l'ali e ra gran crista mova
cumi nu napoliuni chi t'incanta

Oh cacciaturi chi curpiti u signu
mò dicitimi picchì mai Giununi
i tanti aciaddri a vulutu u pavuni
e si senta rigina du vastu rignu

Iddra ch'era na dea particulari
jhina i suvranità e tantu amata
u vulia mai esseri cunsiderata
una chi si facia puru supirari

Ogni diu ch'abitava aru munti
avia capiri ch'era n' aciaddru
spittaculari e mai cumi iddru
ancunatru era su tutti i frunti

I pinni ca spanniva a vintajhu
eranu i pregi i na ranni rigina
ogni fimmina n'è tantu jhina
e ppi l'uamini su nu bagajhu

Giovi stessu spiassu tradiva
e pinsannu ca putiva supirari
senza mai riusciri a uguagliari
i tanti animali si trasfurmava

Udava capitu ca rannizza vera
a ponu aviri sulu chiri fimmini
ca su cumi jhuri intra i giardini
e su ppi ri murtali vera lumera

Chira ca supiratu ogni figura
adurata stimata i tutti quanti
protittrici i fimmini e amanti
è Giunoni ppi ra ranni statura