a cura del Prof. Franco Delfino Cosimo

La poesia ricorda la nascita di mio padre e del suo nome. 
U nannu Gatanu a ra nascita i du fijhu (u papà) 

Doppu Carmela i criaturi murivanu
chini prima e chini doppu i  parti
chiru jhuarnu i cosi   cammiavanu
loccu loccu minni stava in disparti 

Ohi cirasiaddru miu tantu  aspittatu
u ci cridia quannu te sintutu cianciri
cumi na stiddra lucenti si arrivatu
a luci intra a casa  mia a si spanniri 

Fora ogni mali i sa famijha cristiana
amu aspittatu tantu e s'è abbiratu
u suannu i mammata  l'atra simana
ch'a vistu l'anciulicchju ch'a parratu 

Mo mi siantu cumi na  forti catina
beneditta jemma i n'arvulu crisciutu
ch'a datu su jhuri matina ppi matina 
criscia assai  e pruspìra bonuvinutu 

Dorma cu ra Madonna e ru Signuri
tu si u miegghju fruttu i da vita mia
amu prumisu  ca ti chiami Sarvaturi
e ru Mimminuzzu  t'impara ra  via 

Dorma 'ntra su liattu arricamatu
cu sa capiceddra tunna e bruna
u suli cuntiantu  già  tramuntatu
chiama  ri stiddri ppi ti fari curuna 

A luna trasa  e ti vasa cu ra luci
mi vulissa curcari e durmiri cu tia
ppi mi viviri u jatu  e ri suspiri duci
ca mi fanu  a mejjha cumpagnia

( Tutti i diritti sono riservati)