a cura del Prof. Franco Delfino Cosimo

    U cuncuarsu  i beddrizza 
  L'orariu i du  cuncuarsu era già vinutu
tutti i missiceddre da via nova avianu sajhutu
 
Caminavanu ncollanate  dui a dui a braccettu
si sintivanu già bambulicchie cu ru rossettu

I vecchiariddri I du sidili tantu mprissiunati
s'azavanu pi guardari si grazi i Diu mannati

I giuvinotti ncravattati a chiri spuntuna spuntuna
aspittavanu pi aviri a zincata i d'ancuna

A ra fini i du curteu na frotta i guagliuniaddri
zumpavanu e cantavanu cumi tanti griddriciaddri

I mammi a ri spaddri i tutte si signurineddre
facivanu capiri ch'eranu tutte monacheddre

U vulivanu dimustrari i pinsiari i da menti
picchì spiravanu a ri voti i tutta a genti

Quannu na figghia  si mustrava mezza spujhata
pinsavanu sulu ch'era venuta na fata

Vulivanu sulu a tutti dimustrari
ca beddrizza i di figghie u si putia aggualari

A nu certu puntu i chira beddra sirata
na mamma s'era propriu tantu mbervinata

Gridava pi fari sintiri puru a tutti quanti
a figghia mia ati vutari hoi lestufanti

Sulu iddra si pò mintiri na ranna curuna
è tutta beddra luminusa cumi a luna

A sintiri si brutti paroli troppu mpressiunanti
l'atri mammi s'alluntanavanu tutti trimanti

Avianu lassatu sula a povara disgraziata
cu l'atre signurine su scinnute mezzu a strata

Imbasata da figghia rimasta subba u parcu
vulia già ca li facianu nu beddru arcu

A chiri mammi chini i vanità pò capitari sa storia
picchì pi ri figghie tutte vuanu nu pocu i gluaria

Beddre brutte sperte ciote o cumi sia sia
basta ca su cchiù mejhe i l'atre e di tutta a cumpagnia.