a cura del Prof. Franco Delfino Cosimo

I cunsijjhi i Santu Martinu
Sugnu arrivatu i nu paisi tantu lumtanu
pi  ricurdari  a ru  populu rocchitanu 

Ca spata ch'è  nu simbulu i  da guerra
U serva ppi  nui stessi subba sa terra 

Ci vuanu amuri e carità  ppi jiri avanti
e sarvari accussì l'anima i tutti quanti

A ru povariaddru cu ru friddu e ra fami
Datici sempri cumpuartu e veri ligami 

U  ru lassati senza na giacca 'ncuaddru
facitilu durmiri subba nu liattu muaddru 

A ri vecchiariddri ca su lassati suli i parti
U ri trattati cumi si ud'avvissaru ancun"arti

Anu sgubbatu  cu tutta l'anima e suduri
mò vuanu sulu ripuasu cu tantu amuri 

Accarizzàtili i manu e ra frunta ogni jhurnu
accussì l'uacchji s'appiccianu cumi u furnu 

Giuviniaddri chi jhiati sempri i ca e di ddrà
u piati chiri  cattivi e murtali vie pi pietà 

Chiri  brutti sustanzi ca piacianu assai
servanu sulu  a vi purtari eterni guai 

Pi ri patri e ri mammi  u ci su scardeddre 
su rapiranu buanu l'uacchj e ri rijhiceddre 

Riastu  i guardia a ra jhiesa principali
e vidimu  si daviari siti  onesti  e riali 

Quannu  l'unnici novembri è a festa mia
vuajhu a musica e ri canti in cumpagnia

Ma sulu sajhu vistu ca ogni santu jhuarnu
ud'aviti  siminatu tanta malignità attuarnu 

Mi chiamu  Martinu e sugnu u prutetturi
i tutti i Rocchitani  ma no i chiri piccaturi 

Ca mi salutanu cu ru risu  ad ogni vineddra 
cu    l'animu niguru  guali a ra carvuneddra 

Pirciò facitivi nu bell'esami i cuscianza
Ricurdativi ch' aspiattu  cu vera pacianza 

Tra nui amu fattu nu pattu i d'allianza
U binni scurdati  ppi ra santa crianza 

Vuajjhiu spirari  ca a ru nuavu  annu
ppi ra festa mia nuddru  ha fattu dannu 

Allura sì ca  sutta a mità i du mantu miu
u  populu i da Rocca  diventa cchiù 
piu