a cura del Prof. Franco Delfino Cosimo

"A vuci ca mi parra u jhuarnu i di muarti"

Sugnu jhiutu a ru cimiteru a truvari i famijhari
quantu mi giru e siantu na vuci chiamari

Ud’era nuddru i l’appartenenti a ra casa mia
era na vuci debbula debbula ca mi dicia

Sugnu Arturu e mò ti vulissa abbrazzari
ma duvi mi truavu u mi puazzu spustari

U cori miu è ancora affrittu troppu assai
u duluri forti i Patrizia u mi pò lassari mai

Amaru chiru patri quannu perda na fijhia
a casa li si chjiuda cu na duppia manijha

Iddra ch’era nu friscu e duci juri i da vita mia
cumi l’anciuli spanniva sempri sulu alligria

Diciaccillu a tutti quanti i nuastri cari amici
ch ‘ è viva cu gioia a ru munnu i di filici

Sulu su pinziaru mi pò aiutare a guariri
si feriti ch’ancora tiagnu e u sinni ponu jhiri

Cu si paroli m’era scappatu u chiantu
puru u cori miu s’era strinciutu tantu

E` l’amicu miu cchiù caru chi m’ha parratu
troppu priastu chissu munnu ha lassatu

Sugnu rimastu cumi na fridda petra i da via
u ricuardu i chira vuci pusata mi fa cumpagnia