a cura del Prof. Franco Delfino Cosimo

A vinuta di re Magi
La poesia è tratta dal libro ” A terra mia, un dialetto tante lingue”

A ru tiampu d’Erode dittu u Rannu
i Magi ch’avianu vistu a cumeta
senza ca ci fussa ancunu bannu
si partivanu i l’Orienti ppi ra meta

Caminavanu ‘nsiemi ppi dui anni
quannu chira stiddra scumpariva
iddri continuavanu senza affanni
suli viantu e pioggia chi l’affrigiva

Gaspari Melchiorri e Baldassarri
uaru ‘nciansu e mirra purtavanu
nessunu mai putiva immaginari
ca Baldassarri era arabu suvranu

Avia ru cuarpu tuttu anniguritu
iddru sintiva “ntru cori i venerari
u mimminuzzu assai ‘nfriddulitu
‘ntra manciatura u vuliva salutari

Tutta a santa e beniditta nuttata
si spanniva nu profumu singulari
tuttu u tiampu cu ra capu jhicata
sintivanu forti na forza i d’amari

I stiddri s’eranu fatti cchiù lucenti
tutta l’aria pariva jhina i d’armunia
na luci nova mustrava u nascenti
u munnu interu era jhinu d’alligria

Chiru viaggiu cuminciatu i luntanu
ppi sempri vena ancura ricurdatu
è spiranza i tuttu u populu cristianu
duna sustanza a chini è scartatu

Chiri ca venanu di paesi luntani
u ri guardamu ppi ru sulu culuri
ca tenanu a ra faccia e a ri mani
anu avutu nuttati cu tanti duluri

vuanu sulu aviri nu muarzu i pani
abbrazzamuli cu l’animu e ru cori
facimuli puru sintiri essiri umani
a befania ni ricorda i purtari amori

Tutti i diritti sono riservati