a cura del Prof. Franco Delfino Cosimo.

A  Rocca i na vota

Quanti strati tutti  'mpetrati
ciantu muri puru scarcinati

Tanti casi tutti 'mbicchiate
senza nu numeru signate

Si mantenanu stritte stritte
abbrazzate e tutte 'ncutte

picchì si spagnanu i cadiri
tantu  si sentanu i suffriri

Ci su tanti maiali scannati
a ru cruaccu su  pennuliati

Gaddrini pizzulianu a via via
ciucci e muli ppi cumpagnia

Arriati  a chjesa i quadarari
cu ri cassalori ppi manciari

I ricchi baruni cu ri massari
cercanu sulamenti i sfruttari

i giuvinotti ca su senza nenti
e ottenanu u viviri sulamenti

Fimmine 'ncinte a otto misi
sgobbanu ancura ppi ri spisi

Cu vinucuattu fanu u sanciari
u maritu cu ru mulu a ru biviari

U  juarnu i  da scola è arrivatu
avissa esseri cumi u suli natu

I guagliuni u tenanu i quaderni
su cumi senza luci i di lanterni

Gridanu cantanu ppi ogni via
s' ammuccianu a malincunia

U sidili smircia e nu parra
troppi tuarti subba sa terra

I surdati ca si su assittati
ci tenanu a essiri 'ngloriati

Subba u fronti anu pinatu
cumi tanti liuni anu luttatu

Ognunu u smetta i cuntari
nu veru eroi si vò mustrari

Ma i vantaturi chu su rari
cuami cuacci 'ntri granari

cu su munnu i da farsita'
u dicianu propriu a verità

U sidili ascorta e nu parra
vascia l'uacchji a ra  terra

Versu a sira cum' è calata
tutti vanu a ra cumpissata

S. Martinu cu tanta buntà
addi alluntanari a puvirtà

A Rocca nova è  canciata
ogni casa cu ra barcunata

Tutte tenanu  nu giardinu
rosi garofali e rosmarinu

Cu ri strati 'ncatrammati
assai  simu cunsiderati

Ma u paisi ottena valori
si nui u trattamu cu  cori