a cura del Prof. Franco Delfino Cosimo

A prighiera i Mariettina 

Chira notti jazzava forti
tanta nivi a ra muntagna
u viantu friscava a ri porti
a ru paisi e ra campagna 

Mariettina avia ra freva
era tutta abbarruccata
nuddru in casa a vidìva
era veduva 'mbicchiata 

Tutti i jhuarni a ra chjesa
li dicìa a nostru Signuri
m'accuntiantu i na fresa
u vuaghju cchiù si duluri 

Signuri  u m'abbannunari
è veru ca nu tiagnu scoli
u mici anu vulutu mannari
ti dicu sulu quattru paroli 

Aju pirdutu u bellu maritu
senza fijhu sugnu ristata
u distinu miu era signatu
a vita è stata scunzulata 

L' atri godanu sempi  tantu
nuddru dispiaciri 'ntra vita
cu ri fijjhi su stati nu vantu
iu sula mi sugnu attrappita 

U Signuri cu  fa prifirenza
sentami Mariettì li ripitìa
u pirdìri a santa pacianza
dìcia ancura l'Avemmaria 

U'mbidiari chissu e chiddra
nuddru sa quannu vena l'ura
ciarti si sentanu na stiddra
puru ch'anu tanta bruttura 

A povareddra tutta squitata
'ntra chira notti tantu scura
prigannu  s'è addurmintata
pinzava i sazari i da bonura 

Ma u Signuri ca sa primiari
tutta a notti l'ha cunsulata
cussì ha finitu i si lamintari
i preghieri l'avianu sarvata 

Mò u 'nvidia cchiù a nuddru
vida sulu facci chi  cantanu
nova gioia tenanu 'ncuaddru
ogni ricuardu è sulu luntanu

'Ntra chiru munnu tuttu luci
Mariettina a pui cunstatatu
ca putimu essiri assai filici
sulu si u Signuri l'a ordinatu