a cura del Prof. Franco Delfino Cosimo
A palumma da paci

"Paci "si u respiru i du Signuri
cu ttia sulu musica e sirinita'
tu si unicu beni i tutti i criaturi
senza i tia c'è sulu murtalità 

Vìasti cumi na janca palumma
vuli purtannu a tutti fratillanza
i tutti l'aviri si na  ranni summa
senza i tia odiu e morti avanza 

U munnu guarda 'mpenitenza
c'è na furnaci cu sa stuta mai
è ra Russia ca u vò a prisenza
i du populu ucraìnu sulu  guai 

Vula palumma ari carrarmati
'mbuddra a vucca di cannuni 
toccaci u cori a chiri surdati
falli sintiri i gridi di guagliuni 

Vula palumma duvi i regnanti
rivijhali sbattiannu  forti l'ali
dicci i guardari i troppi jhanti
c'è ru piriculu puru i l'arsinali 

Vula palumma va' duvi i mammi
u lassari a nuddru abbannunatu
povari genti cu si ranni drammi
troppu sangu è statu già virsatu 

Vula palumma dicci a s'mperatori
malu da Russia pi seculi allittirata
ch'a spirdutu  l'intellettu e ru cori
vuliannu a terra  ucraina sacrata 

Vula palumma cu ra  primavera
jhetta juri subba u sangu virsatu
illumina si Russi cu ra tua lumera
duna paci e fratillanza a su Statu