a cura del Prof. Franco Delfino Cosimo

A liggenda I du pettirussu

C’è na beddra liggenda ca i du pettirussu
fa nu veru santu cuami na sacra criatura
zumpa e vula subba i surchi i l’aratura
e canta intra i sepi fuassu dopu fuassu

Dìcia ca l’aceddruzzu i du piattu pittatu
nu beddru juarnu subba na cruci bruna
a vistu u Signuri crucifissu cu na curuna
i spini e ra capu jhina i sangu quajjhatu

A cacciatu subitu i spini e sa tinciutu tantu
ca a na fonti d’acqua jhara si vulia lavari
a macchia spannuta a ru piattu santu
ccussì si vagnava e circava i si pulizzari

ma chiru russu era ancura ‘mpinciutu
e cu tutti i stricati viniva cchiù culuratu
cumi i raggi i du suli appena nisciutu
ca fa cantari l’aceddruzzi subba u pratu

Allura vulannu facia tanti e tanti i chiri giri
ppi ru cielu e si sintiva propriu cumpiaciutu
cu vuliva nè manciari nè putia durmiri
i da gioia ranna paria cuami fussa sturdutu

Tutti i jhuarni era accussì cuntiantu
e ppi chira macchia i sangu benidittu
c’ avia cacciatu a ru Re i du forti turmiantu
porta na mirajha prigiata subba u piattu

Va’ aceddruzzu caru i nostru Signuri
diciaccillu a tutti i paisi e a tutti i genti
ca i peni passati su ppi nui piccaturi
e nui ni scurdamu tuttu cumi fussa nenti