a cura del Prof. Franco Delfino Cosimo

 A festa i da Madonna
  
A festa i du paisi chira patrunali
è pi tutti nu juarnu daviaru spiciali
  
Su cuntianti propriu tutti quanti
ma i cchiu' i guagliuni pi ri giganti
  
I giuvinotti e ri signurine u ni parramu
  aspettanu anziusi pi jittari l'amu
  
I santuacchi chi tenanu a cruci subba u piattu
chiru juarnu cancianu abitu ed aspiattu
  
A ra prucessioni tutti fanu finta I prigari
puru I cummari ca su maestre a criticari
  
Mentri a Madonna passa pi ri vie
i genti tenanu 'ntra capu atri litanie
  
U zitu e ra zita si tenanu stritti pi ra manu
 cercanu u si toccanu e caminanu stranu
  
I vecchiariddri ca s'appoggianu forti
si raccumannanu l'anima pi ra morti
  
Intantu u cleru bendicia avanti
canta e nu s'accorgia i di parranti
  
Crida ca tutti priaganu cu rispiattu
inbeci quasi tutti su in difiattu
  
Sulu a banda cu ri noti intra a menti
accumpagna a Madonna e nu pensa ara genti
 
Abbena accussì a santa prucessioni
 tutti su cuntianti pi ra vera divuzioni

A ra fini tutti li sbattanu i mani
pensanu ca su stati bravi cristiani