a cura del Prof. Franco Delfino Cosimo

A canzuneddra i Ciccilluzzu

Mi chiamu Ciccilluzzu e paru stranu
sacciu cantari i quannu era nu nanu

Tanti guagliuni mi venanu appriassu
zumpanu e riranu a ru passu a ru passu
 
Chiri cchiú ranni inbeci mi sfriculianu
sbattanu i mani e tutti sbruffunianu

Padaví pa pa  padaví pa pà
padaví  padaví pa pà

Sacciu puru cantari atri canzuneddre
giru strata pi strata cu si sacchetteddre

Iu u sugnu sulu 'ntra a casa mia
C'è ra mamma cu na forti malatia

Finu a mò nuddru s'ha prisintatu
tena ri labbra sicchi e ru visu sempri sudatu

A cummari ca mi  paria chira adurata
i du primu  jhiuarnu l' adi abbannunata

Abbussu ogni juarnu a ra casa i na vicina
mi rispunnanu sempri ca nescia da matina

Minni va ru cori quannu si lamenta
nuddru a succurra e nuddru  a senta

Pirciò giru sempre a pedi via pi via
fazzu u pagliacciu cu sa litania

Sugnu tuttu luardu e tuttu sciancatu
cumi si i cani mavissaru muzzicatu

Intru u cori però u cantu ma cianciu
mi siantu u cannaruazzu 'ntra nu ganciu

Padavì pa pà  padavì pa' pà  padavì  padaví pa pà

Si mi vuliti dari ancuna cosiceddra
datimilla ca linchiu  natra sacchetteddra

Una è jhina cu scarpi e cu nu vestitu usatu
vaju e ri vinnu u sabatu a ru mercatu

Si mi dati pani ed ancuna sazizzeddra
mi l'ammucciu tutti 'ntra a fadeddra

Si fazzu ancunu sordu udè ciartu ppi mia
ma sulu ppi fari sanari sa povara mamma mia

Padaví pa' pà   padaví pà pà padaví  padavì  pa pà

In giru   Ciccilluzzi ci ni su tanti 
cridimu ca i cerviaddru su mancanti

U pinsamu ciartu mai ca arrassusia
a stessa cosa può capitari a mia