a cura del Prof. Franco Delfino Cosimo

Ciccuzzu u vasciottinu 

Ciccuzzu era di pedi quaranta
caminannu i luntanu  u si vidia
Mariuzza mbeci era na giganta
'nsiami  eranu na vera alligria 

Ciccuzzu u si putia fidanzari
picchí era troppu vasciottinu
i fimmini u sapianu chinni fari
u cunsidiravanu nu piripipinu 

Avia ra capu daviaru appostu
sapia fatigari e guadagnari
vistiva  ordinatu e cumpostu
sulu na mujhera avia truvari 

Tramiti u caru amicu Nicola
su jhuti a ra casa i Mariuzza
iddra abitava vicinu a scola
i nu paisi vicinu a na viuzza 

Cu ru vistitu nuavu e ra scolla
paria propriu u veru signurinu
ogni passu era cumi na molla
era sicuru d'esseri nu figurinu 

Mariuzza sera 'mprissionata
continuava atri voti a ru vidiri
ccussi cuntenta s'è  spusata
ara Rocca dicisa i si trasfiriri 

Ciccuzzu avia na ranni casa
mò tutte si pijavanu i gilusia
parivanu na giarra e capasa
manu e manu stritti ppi ra via 

Si u caru amicu jiva aru truvari
era sempi prontu cu ru sorrisu
stappava a buttijha ppi brindari
Vivimu Nicola dicia tuttu tisu 

U c'è cosa cchiù beddra da vita
quannu 'ntru scuru vidi na luci
Ciccuzzu avia truvatu na 'zzita
u l'inni 'mportava cchiú di vuci.