a cura del Prof. Franco Delfino Cosimo

A furbizia i Luvigina

Mastru Nicola avia a mantinuta
da mujhera pocu ni vulia sapiri
nu jhuarnu si cammiava ra tuta
nu bigliettu da tasca ebbi a cadiri 

Amuri miu u ci dari cchiù retta
ccussì prima o doppu si stanca
mujjherta è na vecchia quazetta
iu sugnu a palumma tua jhanca 

Luvigina allura a lijhiri si paroli
ha pinzatu i da putiri ngannari
cumi sparassa  bummi i tritoli
scriva natru bigliettu cu l'orari

L'ha misu intra a tasca da tuta
cu sa dicitura tantu attraenti
Amuri miu ranni i tutta a vita
viani ntra casiceddra cadenti 

U viu l'ura i ti parrari e vasari
taiu dari tanti  carezzi duci
ca sulu ntru cialu ponu stari
brillanu a ru scuru cumi luci 

Mastru Nicola tuttu pijhatu
i si paroli jhini i tantu amuri
all' orariu ch'era cuncurdatu
si ricava a ru postu cu jhuri 

Luvigina tutta mpumatata
cu nu bellu vistitu scollatu
senza paroli e addubbata
u vasava ccu tuttu u jhatu 

Sturdutu ed ammanzupitu
ppi ra mujhera assai sperta
Mastru Nicola avia capitu
ch'era chira a donna cierta